"e - അക്ഷരക്കൂടൊരുക്കി ബി.എം.എം."

പാമ്പാടി: ബി.എം.എം. സീനിയർ സെക്കണ്ടറി സ്കൂളിലെ നല്ലപാഠം പ്രവർത്തനങ്ങളുടെ ഭാഗമായി   വിവരസാങ്കേതിക വിദ്യയുടെ സഹായത്തോടെ വായനയുടെ ലോകത്തേക്ക് പുതുതലമുറയെ ആകർഷിക്കുവാനായി അക്ഷരക്കൂടൊരുക്കി. ഈ സംരഭത്തിൻ്റെ ഉദ്ഘാടനം വായനദിനത്തിൽ മഹാത്മാ ഗാന്ധി സർവ്വകലാശാല സിൻഡിക്കേറ്റ് മെമ്പർ റെജി സഖറിയ നിർവ്വഹിച്ചു. സ്കൂൾ പ്രിൻസിപ്പൽ റെജി ഏബ്രഹാം അദ്ധ്യക്ഷത വഹിച്ചു.സ്കൂൾ മികവിൻ്റെ 40 വർഷങ്ങൾ പൂർത്തീകരിച്ചതിൻ്റെ ഭാഗമായി സംഘടിപ്പിച്ച നാല്പത് പരിപാടികളുടെ ഭാഗമായി ചെറുകഥളും, കവിതകളും, യാത്രാവിവരണങ്ങളും, നോവലുകളും ഉൾപ്പെടെ 40 പുസ്തകങ്ങൾ കഴിഞ്ഞ വർഷം പ്രസിദ്ധീകരിച്ചിരുന്നു. അവ കൂടുതൽ വായനക്കാരിലേക്ക് എത്തിക്കുന്നതിനാണ് ഈ ചുവടുവെയ്പ്പ്. ഇതിലൂടെ സ്കൂളിലെ കുട്ടി എഴുത്തുകാരുടെ മലയാളം, ഇംഗ്ലീഷ്, ഹിന്ദി ഭാഷകളിലുള്ള കൃതികൾ സ്കൂൾ വെബ് സൈറ്റിലൂടെ ഏവർക്കും ഒറ്റ ക്ലിക്കിലൂടെ ലഭ്യമാകുന്നതാണ്. ചെറുകഥകളും , കവിതകളും  വായിക്കുന്നതിനും,  എഴുത്തുകാരുടെ സ്വന്തം ശബ്ദത്തിൽ കേൾക്കുന്നതിനും സാധിക്കുന്നതാണ്. ഒരേ സമയം e-book ൻ്റേയും, audio book ൻ്റേയും പ്രയോജനം ഇതിലൂടെ ലഭിക്കും. ഇനിമുതൽ സ്കൂളിലെ വിദ്യാർത്ഥികളുടെ സാഹിത്യസൃഷ്ടികൾ ഇതുപോലെ ലഭ്യമാക്കി  അവരെ എഴുത്തിൻ്റെ ലോകത്തിലേക്ക് കൈപിടിച്ച് നടത്തി, അവരുടെ സാഹിത്യാഭിരുചി വളർത്തിയെടുക്കുക എന്നതാണ് പ്രധാന ലക്ഷ്യം. വിദ്യാർത്ഥികളിൽ നിന്നും ഉയർന്നുവന്ന ഈ ആശയം സാധ്യമാക്കുന്നതിന് പ്രിൻസിപ്പൽ റെജി ഏബ്രഹാമും, വൈസ് പ്രിൻസിപ്പൽ എലിസബത്ത് തോമസും വേണ്ട മാർഗ്ഗനിർദ്ദേശങ്ങളും, പിന്തുണയും നൽകി. നല്ലപാഠം കോർഡിനേറ്റർമാരായ അജു നൈനാൻ ജോസഫ്, അജയ് ഏബ്രഹാം എന്നിവർ നേതൃത്വം നൽകി.

പാമ്പാടി ബി.എം.എം. സീനിയർ സെക്കണ്ടറി സ്കൂളിലെ നല്ലപാഠം പ്രവർത്തനങ്ങളോടനുബന്ധിച്ച്  "അക്ഷരപ്പച്ച" പരിപാടിയുടെ ഭാഗമായി സ്കൂൾ ലൈബ്രറിയിലേക്ക് നൽകിയ പുസ്തകങ്ങൾ മഹാത്മാ ഗാന്ധി സർവ്വകലാശാല സിൻഡിക്കേറ്റ് മെമ്പർ അഡ്വ. റെജി സഖറിയ, സ്കൂൾ പ്രിൻസിപ്പൽ റെജി ഏബ്രഹാം എന്നിവർ ചേർന്ന് ഏറ്റുവാങ്ങുന്നു. വൈസ് പ്രിൻസിപ്പൽ എലിസബത്ത് തോമസ്, നല്ലപാഠം കോർഡിനേറ്റർമാരായ അജു നൈനാൻ ജോസഫ്, അജയ് ഏബ്രഹാം എന്നിവർ സമീപം.